Jiergearkomste 2012 fan de KFFB

Sneon 4 febrewaris 2012

KFFB-foarsitter Bakker mei ôfgeand bestjoerder Jacobus Knol

Iepening en betinking

Meastentiids is de Jiergearkomste fan de Kristlik Fryske Folks Bibleteek (KFFB) yn de Fenixtsjerke fan Ljouwert. Mar no’t juster bliken die dat de kachellieding fan dy tsjerke stikken is, hawwe wy de jierlikse gearkomste fan ús Fryske boekeklub yn De Schakel yn it Ljouwerter Camminghabuorren. Foarsitter Johannes Bakker iepenet de gearkomste mei in bibellêzing. Noch foar mei gebed iepene wurdt, betinke wy twa leden fan de KFFB dy’t koartlyn yn desimber 2012, ferstoarn binne en dy’t by’t libben in soad foar de KFFB dien hawwe. Wy betinke Atze Bosch en Dick Eisma. Atze Bosch hat oerset en skreaun foar de KFFB en Dick Eisma - dy’t  ferline jier noch ta earelid beneamd is – hat as bestjoerder (skriuwer en ponghâlder) en als lid fan ‘e Karkommisje in soad wurk ferset; ek bûten de KFFB, foar bygelyks de Afûk. Yn ús fermidden misse wy dy beide KFFB-freonen tige.

Jierferslach skriuwer

It saaklike diel fan de gearkomste wurdt iepene mei it foarlêzen fan it Jierferslach 2011 fan en troch Corry Rozendal-Boelens, sûnt it ôfskie fan Dick Eisma net allinnich ponghâlder, mar ek skriuwer fan it KFFB-bestjoer. Hja docht ferslach oer de 7 bestjoersgearkomsten, oer de nije KFFB-boeken fan 2011, oer de Drachtster Boekemerk, oer de 6.000 KFFB-boekútlienings fan iepenbiere bibleteken, oer de 42 KFFB-boeken dy’t yn 2011 yn Dongeradiel op’e sweef gienen en oer de twa nije bestjoersleden dy’t ree binne om it KFFB-bestjoer fuort te sterkjen. In dúdlik en koart ferslach fan in soad wurk dat KFFB-bestjoerders yn 2011 ferset hawwe. Mei applaus fan de tsientallen leden yn de seal wurdt it bestjoersferslach fan Corry oannommen.

De gitaar by it Boek

Dan harkje wy nei muzyk fan it duo Arjo Osinga (gitaar) & Dries Dalstra (akkordeon), dy’t tusken de saaklike bedriuwen troch in tal lieten sjonge út de nije KFFB-werútjefte ‘De gitaar by it boek’, mei lieten fan Fedde Schurer. Hja sjonge ‘Paradys’ en ‘In spyltúch bin ik yn Gods hân’. Harren sang en muzyk wurdt tige wurdearre.

Jierferslach ponghâlder

Nochris is Corry Rozendal-Boelens oan’t wurd, mei it finansjeel ferslach fan 2011, diskear as ponghâlder fan de KFFB. It ledetal giet mei in hûndert it jier achterút en ús feriening hat noch hast 1400 leden. Mei it ferieningsfermogen binne wy yn 2011 ek achterútgien, mar dan moatte jo ek betinke dat der sûnt koart in prachtige nije bernebibel op de ferkeapplanke leit, dêr’t in soad jild yn ynvestearre is en dy’t de ankommende jierren dizze fermogensdaling hooplik noch finansjeel positiver fuortsette sil. De tiid sil it leare, mar as in soad Fryske húshâldings de moaie KFFB-bernebibel ‘It Heechste Wurd’ keapje sille, komt dat wol goed, tinkt my. De Kaskommisje hat de boekhâlding fan 2011 goedkard en de leden dogge dat ek graach en mei applaus foar Corry als ponghâlder èn foar ús bestjoer.

Utjefteplan 2012

KFFB-bestjoerder Jacobus Knol fertelt as lid fan de Karkommisje dat dy kommisje yn 2011 sân manuskripten beoardield hat. Fan fjouwer âlde manuskripten binne yn twadde lêzing twa oannommen en fan de trije nije manuskripten is ien oannommen, kin ien noch oanpast wurde en is ien ôfkard. Sa kin de KFFB ek yn dit útjeftejier lykas alle jierren wer trije nije romans útjaan. It earste boek wurdt hjoed útjûn en ek feestlik útrikt oan de KFFB-skriuwster Tineke de Jager. Har nije boek ‘De Bosklju’ giet oer de Labadisten fan Waltastate yn Wiuwert. Yn maaie fan dit jier komt in nije misdiedroman ‘De ûntfiering’ út fan skriuwer Lieuwe Pietersen en yn septimber fan 2012 komt de nije roman fan Corry Boelens út, dy’t hannelet oer draachmemmeskip. Alle trije KFFB-romanskriuwers wurde lokwinske mei in knap bosk blommen. En wy binne allegearre bliid mei wer trije nije KFFB-romans dy’t fan’t jier mei niget lêzen wurde sille. Mei dizze trije fêste KFFB-skriuwers sil dat grif goed komme, tinkt my.

Muzyk en Skoft

Foar en nei it skoft sjongt it duo Osinga & Dalstra wer fjouwer lieten: foar it skoft it gefoelige lied ‘Ruth’ en it fleurige ‘David dûnset’ en nei it skoft it gebed ‘Us Heit’ en ‘Garje dy gjin skatten’, mei bygelyks de wurden:

It each, dêrst alles mei besjochste,

is’t lampljocht fan dyn minsklikheid,

It makket út watst tinkst of dochste,

en wat dyn mûle oer it libben seit.

Is dizze lampe skjin en klear,

dan ljochtet hja oer ’t hiele hear.

Mar as it ljocht fertsjustere is,

hoe grut is dan de tsjusternis?

Yn it skoft wurde ek de KFFB-útjeften fan de boeketafel knap ferkocht.

Bestjoersferkiezing

Nei it skoft folget ek de statutêre bestjoersferkiezing. Ofgeand en net werkiesber is Jacobus Knol, dy’t yn de 24 jier fan syn bestjoerssit, en fan syn wurk as lid fan de Karkommisje, en fan syn oersetwurk en fan syn romanskriuwen èn as opmakker fan alle KFFB-boeken in net te beskriuwen grutte bult wurk ferset hat. Foar alles wat Koos dien hat foar de Fryske boekeklub binne net genôch wurden te finen, en hy wurdt mei eare betanke foar syn protte en syn goede wurk foar syn en ús Kristlik Fryske Folks Bibleteek.

Nij ferkiesber as KFFB-bestjoerder binne de twa nijste leden fan de Karkommisje: Pytsje de Graaf (ek wethâlder fan Dongeradiel) en Dussy Ybema (ek dosint Frysk fan de kristlike Pabû fan Stenden Hegeskoalle yn Ljouwert). By akklamaasje-applaus wurde hja beneamd as nije KFFB-bestjoerders.

Omfreegjen en sluting

Yn it omfreegje wurdt noch frege nei it foar de KFFB nije boekebarren fan ‘KFFB-Boek op ‘e Sweef’, ek wol bekend as ‘Book Crossing’; boeken dy’t fan in iepenbiere romte fia ûnferwachte lêzers nei in oare iepenbiere romte sweve en dan ek fia it ynternet te folgjen binne. De KFFB-boeken binne op ‘e sweef gien út it gemeentehûs fan Dongeradiel yn Dokkum wei. Dat, as jo earne op ‘e wrâld yn iepenbiere romtes Fryske boeken sjogge, wit dan dat it faaks swevende KFFB-boeken binne.

Foarsitter Bakker slút de jiergearkomste en de leden prate noch noflik nei, keapje noch in boek by de boeketafel en gean troch in sniewyt lânskip wêr nei hûs.

Lêze en ride

Bûtenút sjogge jo rûnom yn it Fryske lânskip reedriders, mei lange streken en noflik op ‘e sinne oer it glêde iis fan kanalen, fearten, sleatten en marren. Fryslân, ús wetterlân fan thús Frysk lêze en fan fuort bûtenút reedride as it kin.

Dick Eisma te hôf brocht yn De Haske

Woansdei 4 jannewaris 2012

Dick Eisma (1941-2011)

Betinking

Sûnt 2008 wie Dick Eisma al slim siik. Better wurde koe net mear, mar as ambassadeur foar syn taal - de Fryske taal - gie syn leafdeswurk troch, sa lang't it noch koe. Mar fan de deasykte koenen Dick en de dokters it net winne. Op 30 desimber 2011 is Dick Eisma ferstoarn. Hjoed sit de doarpstsjerke fan Aldehaske grôtfol. Famylje en freonen fan Dick nimme yn 'e betinkingstsjinst ôfskie fan Dick om him dêrnei te hôf te bringen yn syn wenplak Aldehaske.

Earelid fan de KFFB

Dick Eisma waard nei de Kweekskoalle skoalmaster en haad fan in legere skoalle. Syn belangstelling foar de Fryske taal feroare geandewei yn syn passy foar it Frysk. Dick helle it doktoraal eksamen 'Friese Taal en Letteren'. Hy waard dosint by de Afûk, skriuwer, korrektor, ûndersiker en oersetter. Tritich jier hat Dick syn bêste krêften ek jûn oan de Kristlik Fryske Folksbibleteek. Hy wie bestjoerder, lid fan de karkommisje, skriuwer en ponghâlder en die alles wat nedich en winsklik wie om fan de KFFB in súkses te meitsjen. Fjouwer jier mocht ik mei Dick gearwurkje yn it bestjoer fan de KFFB. As slútstik hawwe wy tegearre de redaksje en de rezjy hân om it moaie Tinkskrift gear te stallen by it 75-jierrich bestean fan de KFFB. Dick waard by syn ôfskie fan it bestjoer fan de KFFB yn febrewaris 2011 noch beneamd ta earelid.

Behoffene teksten

Dick Eisma wie in wichtich stimulator om minsken safier te bringen dat hja harren teksten yn it Frysk skriuwe. In soad nije en betûfte Fryske skriuwers hat er holpen om yn it Frysk folle fierder te springen as hja ea tocht hienen. In soad Fryske boeken fan de KFFB binne Frysk-geve romans en poëzybondels wurden, mei de grutte ynset en kundige help fan Dick. Lêzers sjogge it fansels net, mar meie wol witte dat it goede wurk fan minsken lykas Dick fan skriuwers en harren skriuwsels makke hawwe wat it no is. Dick hat my ek safier krigen om yn it Frysk te skriuwen. It Bildts is myn memmetaal, mar mei Dick syn help haw ik Fryske teksten skriuwe kinnen yn in kwaliteit dy't ik sûnder syn help net publisearre hie yn kranten, yn it tinkboek en op it ynternet. Dick behoffene myn konsept-teksten en ik learde sa fan him it (gever) skriuwen yn 'e Fryske taal.

Routsjinst
Yn de routsjinst fan fan 'e middei tanket dûmny Anton Verbeek yn syn gebed foar wat Dick Fryslân jûn hat yn de taal, yn it Frysk. Dick wurdt ek betocht troch it oanstekken fan sân kleurde kearsen fan de menorah, oanstutsen troch Dick & Jopie harren sân pakesizzers. Mei de 7 kearsen betinke wy de mominten yn it libben fan Dick; om it goede dat der wie fêst te hâlden, en om wat moeilijk of ferkeard wie los te litten. Alderling fan tsjinst Annie Tigchelaar lit ús yn har foarlêzen tinke oan de hoop, dêr't wy mei libje en dêr't Dick mei libbe; oer:
- dreame fan better wurde;
- op fakânsje gean nei Noarwegen, nei de bern;
- syn ûndersyk nei de drukkers yn Fryslân ôfmeitsje;
- dreame fan lok en goede takomst foar de bern en de pakesizzers;
- it yn stân hâlden fan de Fryske taal.
De griene kears lit ús ek tinke oan de rol dy't wy as minske foar elkoar en as bern fan God ynfolje meie. It giet hjir en no om de hope dy't rjochting jout oan ús dwaan en litten.

Tichtby God

De lêzings en it sjongen binne yn it Frysk; de taal fan Dick, de taal fan ús, de taal fan de Friezen, de taal dy't mei de wurden fan leauwe, hope en leafhawwe fan ús himelske Heit en fan ús ierdske mem ús yn hert en siel rekket, sa't Dick it fielde en it sa graach seach. Lit ús it goede dat der yn Dick syn libben wie en dat ek yn ús libben is, fêsthâlde, mei ús meinimme en God dêrfoar tanksizze.

Moeting mei de dea

Sneon 16 july 2011

Wisse Alfred Pierre Smit (1903-1986) – in dominyssoan út Heumen - wie in ferneamd heechleraar yn Utert. Hy skreau in grut tal wittenskiplike wurken op it mêd fan letterkunde en literatuerhistoarje. Doe’t Pierre Smit syn wittenskiplik wurk ôfsletten hie, namen syn krêften ôf, rekke hy slim siik, swevend tusken libben en dea.

Yn die swiere tiid fan deasiik wêzen, begûn Smit wer fersen te skriuwen. Soks hie hy yn syn jongere jierren ek al dien. Yn 1927 ferskynde bygelyks syn dichtbondel ‘Feesten van ’t jaar’, dy’t in soad yndruk makke. Oan de ein fan syn libben begûn Smit kwatrinen te skriuwen. Yn 1984 begûn syn poëtysk skriuwen wylst er fan syn siik wêzen in soad pine hie. Yn de lange, drege nachten skreau Smit syn kwatrinen. It 150e kwatryn wie klear yn it begjin fan 1985. Fansels binne soksoarte fan gedichten persoanlike skriuwsels, mar se binne sa goed skreaun dat men dizze kwatrinen mei bliuwend fêste oandacht lêst.

Hûndert fan dizze 150 kwatrinen hat Smit oardere ta in dichtbondel, dy’t nei de dea fan W.A.P. Smit (yn 1986) ferskynde by útjouwer Kok út Kampen mei de titel: ‘Ontmoeting met de dood’. Dizze dichtbondel lit op tige minsklike wize wat fan syn deadseangst sjen en fan Smits ferwachting om opnommen te wurden yn de hearlikheid fan it Keninkryk fan syn en fan ús Himelske Heit.

Doe’t ik noch yn it bestjoer siet fan de Kristlik Fryske Folksbibleteek (KFFB) kaam de Fryske KFFB-skriuwer Jan Dotinga fan Koatstertille by it KFFB-bestjoer mei de fraach oft wy syn Fryske oersetting fan dizze dichtbondel yn it fûns fan de KFFB opnimme woenen. De oersetting fan sa’n krêftige dichtbondel komt krekt, dat it is perfoarst gjin lúkse dat oersetter Jan Dotinga de taalkundige KFFB-ers Dick Eisma en Jacobus Knol tank seit foar harren stipe by dizze oersetting. De yn it Nederlânsk skreaune kwatrinen binne knap oerset troch Jan Dotinga. De KFFB hat de útjefte fan dizze dichtbondel yn 2011 fersoarge ûnder KFFB-nummer 467 en dizze bondel mei de searje fan 100 kwatrinen is no te keap by de KFFB foar € 7,50. De Fryske titel fan de dichtbondel is: ‘Moeting mei de dea’.

Om ris te sjen hoe’t soks giet, sjogge jo hjirûnder de Nederlânske ferzje fan Pierre Smit fan syn kwatryn ‘Janua aperta' (De deur staat open):
“De dokter heeft het mij vandaag gezegd:
Het kan met mij opeens zijn afgelopen.
Op dat moment heeft God Zijn hand gelegd
Over de mijne: Kijk, de deur staat open.”

Jan Dotinga hat ‘Juana aperta’ (De doar stiet iepen) sa yn it Frysk oerset:
“De dokter hat it hjoed al tsjin my sein:
’t Kin mei my ôfrûn wêze sa ynienen.
Op dat momint hat God syn hannen lein
Oer mines hinne: Sjoch, de doar stiet iepen.”

Sintraal steane yn de kwatrinen fan Smit it deasiik wêzen, it ferstjerren en it dea wêzen. Dotinga jout oan dizze tema’s fan Smit de folgjende beskriuwings yn it Frysk:

It deasiik wêzen:
- op troch him begrinzge grûn;
- tebekgong fan myn krêften;
- d’ ein fan it libbenspaad;
- De wjerglâns fan syn fingers dy’t my winke;
- wachtsje sûnder roer;
- myn wintertiid;
- yn strime en swypslach;
- op reis nei ’t himelsk heitelân;
- dizze lette oere fan myn libben;
- sit de dea by my oan ’t bêd;
- de swiere striid om myn ferlingd bestean.

It ferstjerren:
- de lêste grins fan it libben;
- ’t Momint fan oergong;
- de ein;
- yn dat ljocht opnommen;
- de oere fan út elkoar te gean;
- dat de ivichheid my ta har sûcht;
- alle grinzen sille iepen brekke;
- de nacht begjint te brânen;
- ferreizgje;
- efter myn eagen wurdt it tsjuster gloed;
- troch de dea nei Him ferheffe;
- nei de grins fan ’t libben driuwe;
- omheech nei Him tasûge.

It dea wêzen:
- Yn ’t ljocht te wêzen;
- troch ’t ivich libben wonken;
- syn ûneinich en ûnmjitlik wiid;
- Seizoenleas wêze;
- de rêst;
- oan de ivichheid besibbe.

Och sa moai bringt Jan Dotinga it proses fan it dichtsjen út de kwatrinen fan W.A.P. Smit nei syn oersetting yn it Frysk, lykas:
‘Mar yn myn geast binn’ fersen oan it driuwen
Dy’t as kwatryn sykj’ om in berteweach.’

Ofskie fan trije KFFB-bestjoerders

Sneon 12 febrewaris 2011

De Kristlik Fryske Folksbibleteek (KFFB) hâldt middeis har Ledegearkomste yn de Fenixtsjerke fan Ljouwert. Ferline jier jannewaris betochten wy it 75-jierrich bestean fan ús Fryske Boekeklub en no binne wy al wer in jier fierder yn de tiid. 'Klim Fleurich Fierder Berch-op', seit it logo fan de KFFB, mar hoe fleurich klimt de KFFB tsjintwurdich eins de berch op? Dêr giet hjoed benammen it praat oer yn dizze jierlikse gearkomste.

De gearkomste wurdt iepene troch Wim van der Schaaf, foarsitter foar in jier fan de KFFB. "Minsken begjinne minder boeken te lêzen", seit Wim. Minsken sykje en fine de rêst net mear om in boek te lêzen. Mobyltsjes en kompjûter mei ynternet nimme it plak yn fan in goed boek, fral by de jongerein. Sa ferspilet it boek syn plak yn ús wrâld. It giet poermin mei it Fryske boek. "De KFFB hat in moai ferline en hat ek in rike tradysje", seit Van der Schaaf. Hoe moat it fierder mei it Fryske boek? Mei 'printing-on-demand' of mei 'e-books'?

Nei de meidielings folget fan skiedend KFFB-skriuwer Dick Eisma syn lêste jierferslach: fan ús feriening oer it jier 2010. It wie foar de KFFB wer in jier mei in soad moaie útjeften, lykas it jubileum-Tinkskrift, romans fan Anders M. Rozendal, Lieuwe Pietersen en Einte Prins, nije Doopkaarten, in werútjefte fan it bibels deiboek fan Doede Wiersma, in bysûndere dichtbondel fan Anny de Jong en in bondel mei koarte meditaasjes fan Tytsje Hibma. As âld-bestjoerslid fan de KFFB wit ik hoefolle wurk KFFB-bestjoerders fersette om in útjefte mooglik te meitsjen, dat safolle moaie publikaasjes yn ien jier is in knap stik wurk fan dit bestjoer. In weardefolle rige publikaasjes hat de KFFB wer taheakke oan it rike fûns fan Fryske literatuer en kultuer.

Skathâlder Corry Rozendal-Boelens besprekt it finansjeel jierferslach en it ferslach fan de kaskommisje. Dan folget de besjoersferkiezing. Ferkiesber en beneamd wurde ús nije foarsitter Johannes Bakker fan Menaam en skathâlder-skriuwer Corry Rozendal-Boelens fan Dokkum. Ofgeand en net werkiesber binne foarsitter Wim van der Schaaf, bysitter Tialda Dijkstra en skriuwer Dick Eisma. Wim van der Schaaf sprekt wurdearjende wurden út ta ôfskie fan Tialda en Dick. Yn it ôfskiepraatsje foar Dick Eisma seit Wim dat Dick mei syn lange bestjoerssit sûnt 1982 en fanwegen de grutte betsjutting fan al it wurk fan Dick foar de KFFB eins it gesicht wurden is fan de KFFB. It bestjoer beneamt Dick Eisma yn dizze gearkomste ta 'Earelid fan de KFFB'. Mei rjocht folget in steande ovaasje fan de leden yn de seal foar Dick. In mânske oarkonde kriget Dick Eisma fan it bestjoer as oantinken oan dit wichtich en seldsum bestjoersbeslút.

Nei it skoft wurde troch de nije foarsitter ek wurdearjende wurden útsprutsen foar alle wurk dat Wim van der Schaaf ferset hat foar de KFFB, benammen ek syn wichtige wurk as lid fan de Karkommisje, earst foar berneboeken, letter foar - sa't yn it ferline wol sein waard - 'de echte boeken'. De trije skiedende bestjoersleden wurde ek yn 'e blommen set.

Dan folget it jierlikse 'Boekepraatsje & Utjefteplan'; noch ien kear útsprutsen troch Wim van der Schaaf, op in wize dy't wy fan Wim wend binne: mei earnst en humor. Wim kundiget de nije útjeften fan 2011 oan. It binne trije oersettings: kwatrinen, in roman en in bernebibel. Der komme ek twa nije romans. Ien fan Hedzer T. Hooijenga en ien fan Anders M. Rozendal. Beide fêste KFFB-skriuwers en beide - by tafal - oer it aktuele tema 'bernelokkerij'.

Ta beslút folgje dan noch it omfreegjen en it sluten fan de jiergearkomste. De KFFB klimt ankom jier wer fleurich fierder berch-op. It bestjoer ropt de leden mei in nije ledewinaksje op om der mei yn te foarsjen dat it ledetal fan de KFFB wer boppe de 1.500 leden komt. Nei de sluting geane de leden noch by de boeketafel del om dêrta allegearre promoasjemateriaal mei te nimmen om dat út te rikken oan kandidaat-leden foar ús feriening 'Kristlik Fryske Folksbibleteek'.

Manuskript Tinkskrift KFFB leit no by Banda yn It Hearrenfean

Moandei 7 desimber 2009

In jier lang hawwe wy as bestjoer fan 'e Kristlik Fryske Folksbibleteek (KFFB) drok dwaande west mei it gearstallen en skriuwen fan in Tinkskrift ta gelegenheid fan it kommende 75-jierrich bestean fan 'e KFFB. Op 29 desimber 2009 is it safier dat de KFFB 75 jier bestiet. It jubileum wurdt fierd yn jannewaris fan 2010.

Hjoed wienen Dick Eisma en ik as bestjoerders fan 'e KFFB by "Drukkerij Banda" yn It Hearrenfean om it manuskript mei alle teksten, foto's en yllustraasjes foar it Tinkskrift by dizze printer te bringen en om mei twa meiwurkers de foarm en ynhâld fan ús feestbondel troch te praten.

De measte meiwurkers wienen doe al nei hûs, dat wy koenen noch moai efkes mei de hear Klunder fan Banda in loop troch it bedriuw meitsje om ris te sjen wêr't ús Tinkskrift yn de kommende dagen foarmjûn en printe wurdt. En no mar wachtsje op it earste printkonsept fan Banda. Wy binne fansels benijd nei dit earste resultaat fan alle wurk dat in grut tal minsken dien hat om in moaie feestbondel foar de KFFB te meitsjen.

74e Jiergearkomste fan de KFFB yn Ljouwert

Sneon 17 jannewaris 2009

Us middei begjint fan 'e middei om tolve oere foar ús as bestjoer fan de Kristlik Fryske Folks Bibleteek (KFFB) yn 'e Fenixtsjerke fan Ljouwert. De boekediskes wurde klear set en mei in koarte bestjoersgearkomste mei sop & broadsjes rinne wy alle saken fan de kommende middei nochris by del.

Om 13.15 oere komme in tweintichtal KFFB-leden foar de Húshâldlike Ledegearkomste, dy't wy alle jierren hâlde. Nei de iepening folget fan ús skriuwer Dick Eisma it Bestjoers Jierferslach 2008 en it Finansjeel Jierferslach 2008: de Jierrekken mei Balâns & Eksploitaasjerekken. Dan folget de bestjoersferkiezing: nei 30 jier is Coby Laanstra mei hulde ôfgeand, wurde foarsitter Minne Vis en skriuwer Dick Eisma wer keazen en wurdt Corry Boelens-Rozendal beneamd as nij bestjoerslid, hja is no ús nije skathâlder. Nei it omfreegjen wurdt dizze statutêre gearkomste sletten.

Om 14.00 oere begjint yn de oerfolle grutte seal de Middeisgearkomste mei it mienskiplik sjongen fan "Sjong bliid en woltemoede, o folk fan God, dyn liet". Nei de iepeningstaspraak fan foarsitter Minne Vis folget it ferslach fan ús Karkommisje troch Wim van der Schaaf. Trije kear tusken de programmadielen sjongt in Kwintet út it koar "Koarbizznizz" fan De Jouwer prachtige sangen yn it Ingelsk en Frysk. Ek in tal lieten út ús eigen KFFB-Ionabondel "Wylde Goes". Harren moaie sang - fan Bach oant Randy Newman - wurdt tige wurdearre.

Foar en nei it skoft is de lêzing fan dûmny Pieter Boomsma fan Nijverdal. Boomsma syn lêzing "In opstap nei it Ferhaal" giet oer it KFFB-boek "Under de sinne fan de Ivige" fan Anders Rozendal. Boomsma: "Dit knappe boek fan Rozendal kin foar in soad lêzers in opstap wêze nei it grutte Ferhaal fan ús Heit yn de taal fan ús mem".

Yn it skoft wurde in soad boeken ferkocht. Fral ek de nije dichtbondel "Alles op syn tiid", dêr't wy as útjouwer fan 'e middei it earste eksimplaar útrikke oan dichter-skriuwer Atze Bosch. Dizze dichtbondel is in gouden kroan op al syn fersen. Nei it Boekepraatsje en it KFFB-Utjefteplan 2009 fan Dick Eisma, folget de priisútrikking fan 'e Puzzelaksje fan de Fleanende Krie en sjonge wy meiinoar ta beslút: "Fan Him, de iene Hear, joech it ferline blyk; it hjoed sprekt fan Syn trou, de takomst is Syn Ryk". Der wurdt noch lang neipraat en it docht bliken dat it programma troch ús leden tige wurdearre wurdt.

En no geane wy -- Klim Fleurich Fierder Berch-op -- op nei it 75-jierrich bestean fan de KFFB op 29 desimber 2009!

KFFB-boekefoarrie ferfarre

Freed 9 maaie 2008

Hjoed ferfarre KFFB-bestjoerslid Dick Eisma en ik it grutste part fan 'e boekefoarrie fan 'e Kristlik Fryske Folks Bibleteek. Jierren lang hat dizze mânske foarrie yn 'e garaazje fan Dick yn Aldehaske goed plak hawn. No is de tiid kommen om foar ús kommende KFFB-bestjoerslid en boekebehearder Corrie Rozendal de foarrie te ferfarren nei in oar plak, by Dokkum om.

Ús oar Dokkumer KFFB-bestjoerslid Jacobus Knol hat in goed plak foar ús boeken fûn yn in pleats yn Boarnwert. Mei ús auto's en twa swiere oanhingweinen fol KFFB-boeken ryde Dick en ik oerdei nei ús nije KFFB-magazyn. Yn Boarnwert hat Koos al in soad wurk ferset mei it meitsjen fan in grut tal boekerakken; in knap stik wurk. Yn Boarnwert stiet Koos klear om Dick en my by te stean mei it sjouwen fan alle boekedoazen fan 'e oanhingweinen yn 'e nije boekerakken. No noch ien kear op en del ryde en dan is de hiele KFFB-foarrie op it nije plak.

KFFB-gearkomste yn de Kurios-tsjerke fan Ljouwert

Freed 18 april 2008

Yn de twadde helte fan de middei is ús bestjoersgearkomste fan de Kristlik Fryske Folks Bibleteek, de KFFB. Diskear moat it fanwege syn syk wêzen sûnder ús foarsitter Minne Vis.

Wy ferwolkomje ús nije bestjoerslid Tialda Dijkstra en ek noch ús oankommende skathâlder Corry Rozendal-Boelens, dy't op 'en doer it finansjele wurk en de ledeadministraasje fan ús tsjintwurdige skriuwer/skathâlder Dick Eisma oer nimme sil.

Ús gearkomste giet hjoed fral oer allerhande feroarings yn ús bestjoerlik fermidden dy't yn 2008 en foar in part ek yn 2009 ophannen binne. Hjoed docht ek mar wer dúdlik bliken dat bestjoersleden meastentiids in soad wurk foar de feriening dogge, wat net alle dagen sichtber is, mar wol alle dagen trochgiet. Wy sjogge der meiinoar op ta dat it bestjoerlike en it organisatoryske wurk fan de KFFB sa goed mooglik trochgiet, ek as it minsklik sjoen swier keallet as it troch siik wêzen net mear kin sa as jo dat eins wolle. Mar meiinoar fine wy ek hjoed yn ús gearkommen oplossings, dy 't ús as bestjoer en feriening op passende wize wer fierder troch en fierder yn de tiid bringe.