zondag 5 oktober 2008

Us Wylde Goes fan de KFFB fljocht út yn Drachten

Snein 5 oktober 2008

As bestjoer fan de Kristlik Fryske Folks Bibleteek (KFFB) binne wy tige wiis dat wy hjoed in nije sjongbondel útjouwe. Dat is it Fryske Iona-lieteboek mei de titel "Wylde Goes". It is in bondel mei 53 geastlike lieten út Glasgow en Iona, dy't troch Atze Bosch oerset binne.

Jierliks organisearret de Yntertsjerklike Kommisje foar de Fryske Earetsjinst (YKFE) in sjongmiddei yn ús provinsje. Hjoed is it in bysûndere sjongmiddei: mei de oanbieding fan ús nije Iona-lieteboek sintraal yn it middeiprogramma. De sjongmiddei hâlde wy hjoed yn de Oase-tsjerke fan Drachten. Der wurde lieten song út it Lieteboek foar de Tsjerken, út Tuskentiden, út Tusken rein en sinne, út Tachtich lieten út Taizé, út Zingend geloven èn fansels ek út de nije KFFB-bondel Wylde Goes.

De bern fan it bernekoar Sinnestrielen komme ûnder lieding fan Durk de Vries sjongend de tsjerke yn mei: "Kom, lit ús fleurich sjonge". Nei it wolkom fan YKFE-foarsitter Tytsje Hibma en de liturgyske iepening fan de Drachtster dûmny H.J. de Groot, nimt muzikus Jan Breimer de lieding fan it programma op him. As kantorijs werke ek de sjonggroep Eigenwize en it fokaal ensemble Trial and Error ûnder lieding fan Egbert Klazenga mei. De oargelbegelieding is fan Auke de Boer, mei Muriël Seinen op hamboai en Sjirk Seinen op trompet. Moaie muzyk!

Yn in yntermezzo nimt KFFB-foarsitter Minne Vis it wurd. Hy fertelt wat der allegearre dien is om it safier te krijen dat wy hjoed dit weardefolle Iona-lieteboek presintearje kinne. In soad minsken - dy 't allegearre net neamd wurde, maar wol in soad dien hawwe - hawwe yn 'e ôfrûne jierren allegearre dien wat nedig en winsklik wie. It earste eksimplaar wurdt troch Minne Vis oanbean oan Atze Bosch, de oersetter fan de Iona-lieten. It twadde eksimplaar wurdt oanbean oan dûmny J.P. Boomsma fan 'e Rie fan Tsjerken yn Fryslân. En dan kinne we genietsjend sjonge fan de rispinge: in tal moaie lieten út de nije meartalige Iona-bondel.

Nei it skoft wurdt der in grut ferskaat oan Frysktalige lieten songen út de ferskate sjongbondels dy 't Fryslân - en de Friezen - ryk is. Nei de sluting fan Tytsje Hibma jout dûmny De Groot in Fryske seine mei nei hûs. Mei de kompliminten oan alle meiwurkers: in tige slagge sjongmiddei! Der wurde ek in soad nije bondels ferkocht en meinommen, dat wy kinne mei rjocht sizze dat de Wylde Goes útflein is.

2 opmerkingen:

Unknown zei

Is dit boekje (Wylde Goes) noch earne te besetten? Sit dêr ek blêdmuzyk by?

Mei in waarme groet fan

Jeanette en Lammert Dijkstra
Skoatterlânskewei 82
8414 LZ Nijhoarne
Till. 06-51827653
b.n.o. 0513-529409

Wiep Koehoorn zei

Goeie Jeannette en Lammert,
Ik seach niiskrekt dat it boek noch te keap is fia de webside fan de KFFB, sjoch dêr mar ris, dan sil it as bestelling fia it e-winkelweintsje fan de KFFB grif wol goed komme, tinkt my.
Mei de groetnis fan
Wiep Koehoorn
8apr21