It logo fan Krúspunt

Moandei 20 desimber 2010

Op inisjatyf fan de Rie fan Tsjerken yn Fryslân hawwe in grut tal organisaasjes dy’t harren rjochtsje op it befoarderjen en it brûken fan it Frysk yn tsjerke, yn earetsjinsten en dêr bûten, yn 2008 in wurkgroep yn it libben roppen. Oan’t en mei de oprjochting wie ik lid fan dizze oprjochtinggroep. Dizze groep moast der yn foarsjen dat der in nij “Frysk Oekumenysk Platfoarm” oprjochte wurde soe. Dat platfoarm bringt allerhande ynformaasje en materiaal byinoar foar eltsenien dy’t mear witte wol fan wat der allegearre beskikber is en dêrmei ek foar elts dy’t al it beskikbere Frysktalige materiaal brûke wol yn en bûten tsjerke.

Sa is op 2 juny 2009 “Krúspunt” it moetingsplak wurden foar organisaasjes en persoanen dy’t mear wolle en kinne mei it Frysk yn en om tsjerke hinne. Sûnt de oprjochting sammelet Krúspunt, oan ‘e digitale snelwei fan it ynternet, alle ynformaasje, nijs en ûntwikkelings, dy’t raakflakken hawwe mei tsjerke/religy en de Fryske taal/streektalen. Mei help fan de webside fan Krúspunt ûntwikkelje de frijwillige meiwurkers in databank mei relevante ynformaasje oer it brûken fan it Frysk yn lieten en gedichten, yn liturgy, tsjinsten en diskusjerûnten, mei weblinks en aktualiteiten, mei fideo, foto’s en muzyk.

Matthijs Mol fan Nyegea hat it logo fan Krúspunt makke. Dit sprekkende logo is keazen as winnend logo fan in priisfraach dy’t Krúspunt dêrta útskreaun hie. It ûntwerp fan Matthijs Mol wie it winnend logo, dat presintearre is yn de earste jiergearkomste fan Krúspunt.

• Yn it logo sjogge jo de ûnderskate paden byelkoar kommen yn it “chi-ro”-teken. Dat lit jo sjen dat Krúspunt foar eltse kristen in iepen moetingsplak is, dêr’t elk syn eigen ynbring ha kin.
• De letter “T” is it krús. Foar eltsenien bekend as kristlik symboal.
• Oer dit alles hinne sjogge jo it reade Pompeblêd. Dat stiet foar it Fryske karakter fan Krúspunt.