KFFB-bestjoersgearkomste yn 't Ponkje fan Wâldsein

Freed 20 maart 2009

Oan 'e ein fan 'e middei komme wy as bestjoer fan 'e Kristlik Fryske Folks Bibleteek gear yn restaurant 't Ponkje fan Wâldsein. It wurdt in bysûndere gearkomste. It earste diel fan 'e gearkomste is formeel bestjoerlik en it twadde diel is in ynformeel jûnsbarren.

De bestjoersgearkomste yn 'e boppeseal fan 't Ponkje hat in folle wurklist oer (presintaasjes fan) nije útjeften, boekefeesten dy't west hawwe en noch komme, propaganda om nije ferieningsleden oan te bringen èn lange en brede petearen oer it kommende jubileumfeest fan 'e KFFB, soks mei it each op it 75-jierrich bestean fan ús Fryske boekeklub KFFB yn desimber 2009.

Nei it omfreegjen en sluten geane wy nei ûnderen ta om yn it restaurant fan 't Ponkje ús gearkomste mei lekker iten fuort te setten, mei ús ôfgeand bestjoerslid, frou Coby Laanstra. Hja hat mear as tritich jier bestoerslid west fan 'e KFFB, dat wy tochten dat it wis wol fertsjinne wie om har in noflike jûn mei in lekker miel oan te bieden. It docht bliken dat wy foar dizze jûn in goed plak útsocht hawwe. It sit tige treflik yn dit restaurant, dat jierren ferlyn al kaam is yn dit âlde skûltsjerkje, de âld-Fermoanje fan Wâldsein.

Wy krije lekker iten, hawwe de hiele jûn ris noch mear persoanlik praat as dat wy wend binne yn ús bestjoersgearkomsten en oan 'e ein fan 'e jûn is it ús foarsitter Minne Vis, dy't mei in ôfskiepraatsje komt mei tige wurdearjende wurden foar it folle en it goede dat Coby yn al dy jierren yn 'e KFFB en mei alle KFFB-(bestjoers)leden dien hat. It is al let op 'e jûn as ik Coby nei hûs ta ryd en har thúsbring. Sa'n moaie jûn, it is wol it minste dat wy as bestjoer noch dwaan kinne foar dit ofskienimmend bestjoerslid, dy't har in soad fan har aktive jierren fol oertsjûging mei hert en siel ynset hat foar ús feriening èn foar harren leden en lêzers. Coby, farwol!

KFFB-bestjoersgearkomste yn Ljouwert

Woansdei 4 febrewaris 2009

De earste bestjoersgearkomste fan 'e Kristlik Fryske Folks Bibleteek (KFFB) is hjoed yn 'e Kurios-tsjerke fan Ljouwert. De earste gearkomste nei tritich jier sûnder âld-bestjoerslid Coby Laanstra, no't hja yn jannewaris 2009 yn 'e Jiergearkomste ôfskie fan ús nommen hat. Ik wurd beneamd ta twadde foarsitter fan it KFFB-bestjoer, no't Coby ôfgien is. Wy prate hjoed in datum ôf foar Coby har wolfertsjinne ôfskie fan ús bestjoer, yn 't Ponkje fan Wâldsein. Fierder sjogge wy werom op wat allegearre west hat en wat troch ús dien is nei ús foarige gearkomste en wy evaluearje de Jiergearkomste fan 17 jannewaris 2009. Dat wie in boppeslach, fûnen ek ús leden.

Wy beprate in nij manuskript, in al âlder manuskript en de kranteresinsjes oer ús útjeften. Fierder prate wy oer de presintaasje fan trije nije KFFB-boeken en beprate in mooglik nije bewurking fan in bernebibel fan 'e KFFB. In tal jildsaken komme oan 'e oarder, dy't ús by steat stelle moatte om ús nije - ek bysûndere - útjeften fan it 75e besteansjier fan 'e KFFB mooglik meitsje te kinnen. Dy finansjele stipe fan oerheid en fûnsen binne wy nedich om jierliks in tal goede romans en bygelyks dichtbondels, lieteboeken en oare spesjale útjeften út te jaan.

Ta beslút prate wy oer ús ôffurdiging nei it Frysk Boekefeest by gelegenheid fan it 75-jierrich bestean fan "It Fryske Boek". It lêste besprekpunt is in wichtich punt: hoe komme wy wer oan mear leden? Kommend jier wolle wy aksjes fiere om it tal leden ta nimme te litten. Ek yn ús 75e besteansjier is it noch altyd foar ús: "Klim Fleurich Fierder Berch-op" (KFFB).

74e Jiergearkomste fan de KFFB yn Ljouwert

Sneon 17 jannewaris 2009

Us middei begjint fan 'e middei om tolve oere foar ús as bestjoer fan de Kristlik Fryske Folks Bibleteek (KFFB) yn 'e Fenixtsjerke fan Ljouwert. De boekediskes wurde klear set en mei in koarte bestjoersgearkomste mei sop & broadsjes rinne wy alle saken fan de kommende middei nochris by del.

Om 13.15 oere komme in tweintichtal KFFB-leden foar de Húshâldlike Ledegearkomste, dy't wy alle jierren hâlde. Nei de iepening folget fan ús skriuwer Dick Eisma it Bestjoers Jierferslach 2008 en it Finansjeel Jierferslach 2008: de Jierrekken mei Balâns & Eksploitaasjerekken. Dan folget de bestjoersferkiezing: nei 30 jier is Coby Laanstra mei hulde ôfgeand, wurde foarsitter Minne Vis en skriuwer Dick Eisma wer keazen en wurdt Corry Boelens-Rozendal beneamd as nij bestjoerslid, hja is no ús nije skathâlder. Nei it omfreegjen wurdt dizze statutêre gearkomste sletten.

Om 14.00 oere begjint yn de oerfolle grutte seal de Middeisgearkomste mei it mienskiplik sjongen fan "Sjong bliid en woltemoede, o folk fan God, dyn liet". Nei de iepeningstaspraak fan foarsitter Minne Vis folget it ferslach fan ús Karkommisje troch Wim van der Schaaf. Trije kear tusken de programmadielen sjongt in Kwintet út it koar "Koarbizznizz" fan De Jouwer prachtige sangen yn it Ingelsk en Frysk. Ek in tal lieten út ús eigen KFFB-Ionabondel "Wylde Goes". Harren moaie sang - fan Bach oant Randy Newman - wurdt tige wurdearre.

Foar en nei it skoft is de lêzing fan dûmny Pieter Boomsma fan Nijverdal. Boomsma syn lêzing "In opstap nei it Ferhaal" giet oer it KFFB-boek "Under de sinne fan de Ivige" fan Anders Rozendal. Boomsma: "Dit knappe boek fan Rozendal kin foar in soad lêzers in opstap wêze nei it grutte Ferhaal fan ús Heit yn de taal fan ús mem".

Yn it skoft wurde in soad boeken ferkocht. Fral ek de nije dichtbondel "Alles op syn tiid", dêr't wy as útjouwer fan 'e middei it earste eksimplaar útrikke oan dichter-skriuwer Atze Bosch. Dizze dichtbondel is in gouden kroan op al syn fersen. Nei it Boekepraatsje en it KFFB-Utjefteplan 2009 fan Dick Eisma, folget de priisútrikking fan 'e Puzzelaksje fan de Fleanende Krie en sjonge wy meiinoar ta beslút: "Fan Him, de iene Hear, joech it ferline blyk; it hjoed sprekt fan Syn trou, de takomst is Syn Ryk". Der wurdt noch lang neipraat en it docht bliken dat it programma troch ús leden tige wurdearre wurdt.

En no geane wy -- Klim Fleurich Fierder Berch-op -- op nei it 75-jierrich bestean fan de KFFB op 29 desimber 2009!